هرطقات جامعي “15″ : جزيرة الكنز ..!!

بالنسبة للمقال المحمي ، فهو إهداء لقروب فور بمناسبة المقال رقم 14 ، وشكرا للشباب اللي ذكروني ، طبعا اللي يبغى الباسوورد من قروب فور يكلمني سواء بالتلفون أو في الجامعة أو يرسل لي عن طريق صفحة كونتاكت ليفرعمر ، بالنسبة لباقي المتابعين من جميع أنحاء العالم فهم غالبا مارح يفهموا الإهداء ، anyway إذا في أحد منهم اللقافة تقتله يبغى يعرف إيش في المقال يراسلني ..

***

لاحظتوا أني بأكتب اليوم باللهجة العامية ولا لسه ؟! طبعا لا أخفي عليكم أني أرتاح أكثر بالكتابة بالفصحى ، لكن واحد من الشباب طلب مني أكتب بالعامي لأنه يقف عاجزا عن الفهم أمام قدراتي الهائلة في إستخدام مفردات اللغة العربية الفصحى ، فقررت أني أجرب الكتابة بالفصحى كل فترة وفترة ، وبالنسبة لجمهوري من خارج المنطقة اللي يصعب عليهم فهم اللهجة العامية رجاء مراسلتي وفي حال تواجد عدد مناسب لا يستطيع الفهم سأقوم بإنزال نسخة فصحى من المقالات المكتوبة بالعامي

***

واحد من أصحابي الليفربوليين يعشق المسلسل الكرتوني القديم ” جزيرة الكنز ” ، وبكل صراحة فأنا ما ألومه لأنه مسلسل أسطوري رائع ، لكن صاحبي – خلونا نسميه Mr : Spectacular مع أن أغلب القروب عندنا يعرفه باسم the kop وهو مشهور بالنكت اللي يرسلها لي دائما وآخرها نكتة الأسد والحمار - يعشق المسلسل too much .. إليكم بعض المقاطع من محادثاتي معه ،

(1- غريي ، مثل سبكتاكيولار الأعلى .. )

( Mr : Spectacular أرسل لي مقطع صوتي لجزء من الحلقة الأخيرة يتكلم عن إيش صار للأبطال في النهاية )

LiverOmar©: مين غريي ؟ 

  Mr : Spectacular:: ابو السكاكين .. الي شعره رصاصي .. يواد اعشقه

 LiverOmar©:: ايوا .. اللي لمن كانوا في الحصن ويبغوا جيم يدور على واحد ينط فوق السور ويضلل رجال سلفر عشان جيم يخرج 

 Mr : Spectacular:: ايييييييوا

 LiverOmar©:: وبعدين يقابل تلاتة رجال بمسدسات وينجو منهم 

 Mr : Spectacular:: كان مع الي في الحصن .. يواد رجل بمعنى الكلمه .. اعطى حصته من الكنز لواحد معاهم فقير .. ومات دفاعا عن وطنه .. هوا اظنه مو انجليزي

( 2- البطل الحقيقي .. )

LiverOmar© : سلفر كان بطلي  
LiverOmar© : بعدين طلع شرير  
LiverOmar© : اتصدمت فيه
Mr : Spectacular  : كان ؟ .. يواد انا مازال بطلي

 ( 3- حب إلى حد الجنون )

Mr : Spectacular  : اليوم في العزا جالسين نتكلم عن سيلفر .. واحد يقول عنده القصه في كتاب فيها تفاصيل مررره حلوة

Mr : Spectacular  : الكتاب بالعربي والانجليزي

Mr : Spectacular  : شكله حيجي يوم اشلخ الكتاب منه 

***

زي مالاحظتوا حتى أنا أشاركه في حب المسلسل وفي محادثات كتير تكلمنا فيها عنه ، لكنه بكل تأكيد يحب المسلسل أكتر مني لدرجة انه حط أغنية المسلسل كنغمة يسمعها الشخص اللي يتصل عليه ، فعشان كدا كنت أدق عليه كل يوم مليون مرة وهو مسكين يحسبني أحبه  .. وهنا نصل إلى بداية موضوع اليوم ( كل اللي فوق كان مقدمة  )

اللي صار دا الأسبوع هو ..

Mr : Spectacular  : يواد اليوم واحد كلمني .. رقم غريب اول مرارديت عليه .. قلي اقولك ايش النغمه دي ؟؟ انا قعدت اضحك .. قلي صراحه فاجأتني

Mr : Spectacular  : قلتله يعمي .. شباااااب لاتدقق

Mr : Spectacular  : قلي معاك مدري مين فلاته من شركة %#$%^ لانك ارسلت السي في وابغا اتكلم معاك شويا

Mr : Spectacular  : بعدين قال بس صراحة النغمه .. وسكت .. قلتله ايش صدت نفسك ؟؟ .. قلي تقريبا 

Mr : Spectacular  : يواد عدمني 

Mr : Spectacular  : المهم سألني كدا كم سؤال عن دراستي .. وخرشتلوا اي كلام .. وقال خلاص احنا نشوف ونردلك

Mr : Spectacular  : يواد حزفت النغمه 

LiverOmar©:: يعني معد ادق عليك ؟ ( هادا اللي استفدته من الهرجة دي كلها  )

Mr : Spectacular  : لا بس من جد .. دوبي انتبهت .. الان انا في مرحله مفصليه من حياتي << كيف بس مفصلية 

Mr : Spectacular  : يعني لازم انتبه انه اشياء زي كدا تأثر 

LiverOmar©:: اقولك انا قررت قرار جريء ( بكل دهاء/ندالة غيرت الموضوع  )

***

( عدد كلمات الموضوع حتى الآن : 546 ونحن لسه مابدأنا الموضوع  )

طيب خلونا نسرع ، الهدف من القصة السابقة كانأنونعرفانبعضالتصرفاتاللينسويهاحتىلوماكناشايفينفيهاشيممكنتأثرعليناوعلىمستقبلناوخصوصابالنسبةلناكطلابكليةالطبفالناسيتوقعوامناأكثرمنأيأشخاصتانين ، أوبس شكلي زوّدت السرعة زيادة عن اللزوم ، يذكرني بواحد داك اليوم كان مسرع .. لكن ديك قصة تانية ، نرجع للهدف من القصة ..

الهدف من القصة كان أنو نعرف ان بعض التصرفات اللي نسويها حتى لو ما كنا شايفين فيها شي ممكن تأثر علينا وعلى مستقبلنا وخصوصا بالنسبة لنا كطلاب كلية الطب فالناس يتوقعوا مننا أكثر من أي شخص تاني ، ممكن أشياء تافهة نعملها تغير نظرة الناس لنا ، أنا مثلا أشوف أن مافيها شي لو رحت الجامعة بتي شيرت ليفربول ، لكني لو رحت لدكتور ولقيته لابس تي شيرت مانشستر مارح أرضى أتعالج عنده ! وانتو قيسوا على ذلك ..

لكن مو معنى كلامي أننا نركز على رأي الناس فينا لدرجة تجعلنا نترك عاداتنا غير السيئة حتى نرضيهم ! يعني مو معنى أن الناس ماتحب اللي يشرب عصير الخس أننا مانشرب عصير الخس!

***

قبل فترة كنت أتفرج أحد عروض الـ stand-up comedy .. أحد الكوميدين بدأ عرضه بقوله ( أو بالأصح بترجمتي لقوله ) : ألا ندرك مدى غباء المواضيع التي يتحدث فيها الناس ؟! دائما ما يسأل الناس : would you do that ؟ ( نظيرتها في لهجتنا : أتحداك تسوي كذا ) ..

بصراحة كلامه صحيح ، وهذي التحديات ( رغم أني أحبها  ) لكنها تؤثر بشكل كبير في رأيي الأشخاص الثانين فينا ، لذا خلاصة الموضوع :

( هاردلك سبيكتاكيولار على الوظيفة  + لازم ننتبه لتصرفاتنا وتأثيرها علينا + نقلل من التحديات )

قود نايت ..

بالمناسبة .. الويكند هذا كان رهيب ، خصوصا أن اليوم كان دكتور البايو غائب ( راجعوا المقال رقم 7  ) فـ الدوام كان من الساعة 1 إلى الساعة 5 ، فكانت سهرة أمس من أجمل السهرات ، بالمناسبة في ناس مساكين اليوم كان دوامهم من 8 إلى 5 .. هاهاهاهاها .. وبكرة ماعندي إلا من 10 لـ 1 ، بينما نفس الناس المذكورين قبل قليل عندهم من 8 إلى 12 ونص .. هاهاهاها

***

للإستماع لأغنية جزيرة الكنز بصوت المغني : سامي كلارك ( بالله لو اسمك كلارك حتسمي ولد سامي ؟!  )

هنــا

***

للتعليق على هذا المقال

هنــا

 LiverOmar©